چ خهیرهن عاڵهم مات و سهرسامهن
یانی های خوڏا چێشش مهرامهن
ئهمـرهن پــــهی عاڵــهم ئاماڏهباشهن
کاینات فهرشی ئامــــــــا و لواشهن
ئهمرهن کاینات مــات و بێدهنـگهن
نجووم ههراسان مانگ شهوهزهنگهن
فهرماش(جبراییل)مهحرهمی راز بۆ
بێ وچان ئێشه و باڵ وه پهرواز بۆ
(اسرافیل) سوور و بهزم و ئاههنگش
موههیا کهرو نهی هه زار رهنگش
(عزراییل) قهبزی ئهرواح نهکهرۆ
(دق الباب) وه ماڵ هیچکهس نهدهرۆ
(میکاییل) ئێشـهو ئامــاڏه باشهن
وارانی نیعمهت، شـــــــهوی شاباشهن
مهلهک بێوچان شهوی تههلیلهن
شوکرانهی زاتـــــــی رهبی جهلـــــیلهن
دهسـا با وههــار قهڵــهم گێــرۆ دهس
نهقاشی کهرۆ گـــــــــوڵانی سهرمهس
ول ههنار ســـووریش نمایان کــهرۆ
با چنوور ئێشهو بۆ ئهفشان کـهرۆ
پهپـــووله به نــاز قهنـــاری نه چهم
زهریــــــــــــــــــوهل وانــۆ ئارام و ئهســهم
فڕهی باڵی سۆس کاوهتـــر کۆکۆ
واچۆ میـــــــــلادهن یاران مــــــــوژده بۆ
خولاسه دهشت وسارا وکــهش وکۆ
پهی ئامای حهزرهت گرد موههییا بۆ
دهسا مانــگه شهو چوارده شــهو بۆ
حهیفهن پهی میلاد هیلالی نهو بۆ
رۆجیار چۆپیکێش پهی ستاران بۆ
نهوای های سهلام به هـــــــهزاران بۆ
دهیسا ئازیزم چهمــــهن فهرشی ران
نهرگیش حهسرهتمهند چهم به تهمهنان
(جبریل) بێ وچان باڵ وه پهروازهن
مهلهک پهی ئامایت ئاواته وازهن
نۆ مانگ و نۆ شهو نۆ دهقیقه شی
(اللـــــــــه اکبــــــــــر) واڏهشهن وهشی
بهرئاما پرشهی نووری بێ وێنهش
گهردهن چوون بلوور جام و ئایینهش
ههلههلهی شاڏی نۆشانۆشی مهی
بهعشقی حهزرهت چندوهشهن وهی وهی
وهشهن سهڏای ساز و نهی ئێشهو
وهشهن تا بهیــــان مهست مــــــهی ئێشهو
دهسا یا رهسوول قهڵهم ناتـــــــهوان
وهسفی جهمالت بـــــــــــــکهرۆ بهیان
بها ههر مهڕیابۆ قهڵـــــهم وزوان
وهسفش حهواڵهی ئایاتی قورئـــــــــان
(انـــــک لعلی خلـــــق عظیــــــم )
کێ ماچۆ؟ خوڏای رهحمان و رهحیم
وهرنه من غهیرهز رووی شهرمهساری
چێشم ههن وهلات باروون دیاری
سخن کۆمهکاڵ
